Быдгощ,

Польша Республикасы, 2025 жылғы мамыр

Shakarim University өзінің Еуропадағы академиялық орнын нықтай түсті 

Интернационалдандыру бағыты аясында университет ректоры Думан Орынбеков пен интернационалдандыру және инновациялар жөніндегі проректор Ерасыл Дулатбай 2025 жылдың 12–16 мамыр күндері Польшаның Быдгощ қаласындағы WSG University (Экономикалық университет) базасында өткен беделді International Erasmus Week іс-шарасына қатысты. Бұл сапар Shakarim University-дің Еуропа университеттерімен орныққан серіктестігін кеңейтуге және шетелдегі академиялық беделін арттыруға бағытталған кезекті маңызды қадам болды.

Бұл сапардың маңызы қандай?

Польша университетінің басшылығы және Канцлерімен тікелей келіссөздер жүргізіліп, академиялық байланыстарды кеңейту мәселелері талқыланды;

Халықаралық ғылыми және студенттік жобалардың негізі қаланды;

Қазақстандық университеттің жаһандық деңгейдегі орны нығайтылды.

Сапардың мақсаты – тек академиялық байланыстар орнату ғана емес, сонымен қатар, Президент Қасым-Жомарт Тоқаевтың жоғары білім беру жүйесін жаңғырту және әлемдік ғылыми кеңістікпен ықпалдастықты күшейту жөніндегі тапсырмаларына сәйкес, ұзақ мерзімді халықаралық әріптестікті стратегиялық тұрғыда қалыптастыру.

Талқыланған негізгі мәселелер:

"Спорт және рекреация менеджменті" бағыты бойынша қос диплом бағдарламасын жаңарту: жүзеге асырудағы қиындықтар, шешу жолдары мен даму картасы талқыланды;

Академиялық мобильдік: студенттер мен оқытушылар алмасуды дамыту жолдары айқындалды;

Бірлескен оқу модульдері мен пәндерді енгізу мүмкіндіктері қаралды;

Ағылшын тіліндегі магистрлік бағдарламаларды бірлесе ашу жайы сөз болды;

Ғылыми жобалар мен халықаралық гранттарға   экономика, цифрландыру, экология және спорт салалары бойынша бірлескен өтінімдер дайындау;

Білім мазмұнын халықаралық сапа стандарттарына сәйкестендіру.

Мәлімет үшін: WSG-де оқитын 1500 шетелдік студенттердің қатарында 34 елдің өкілдері бар. Дегенмен, қазақстандық делегацияның сапары мазмұнды әрі мағыналылығымен ерекшеленді.

Іссапар аясында Польшада оқып жатқан қазақстандық студенттермен кездесу өтті, спортшыларды дайындауға арналған олимпиадалық орталық таныстырылды және академиялық мобильділікті кеңейту стратегиялары талқыланды.

Жастарды қолдау. Жас көшбасшылар және халықаралық сараптама

Бұл сапардың ерекше маңызын арттырған фактор – Shakarim University интернационалдандыру және инновациялар жөніндегі проректоры Ерасыл Дулатбайдың қатысуы болды. Қазіргі таңда ол – Қазақстандағы халықаралық сертификаттау стандарттарын енгізуге уәкілетті CNAS техникалық сарапшысы мәртебесіне ие жалғыз маман. WSG университетімен академиялық серіктестікті үйлестіруші де Ерасыл Алтайұлы. Бұл – университеттің халықаралық форумдарға қатысып қана қоймай, нақты шешімдерге, құзыреттер мен адами капиталға негізделген жұмысын ілгерілетіп жатқанын көрсетеді.

WSG-де білім алып жүрген қазақстандық студенттермен кездесу әсерлі өтті. Шай үстіндегі бейресми әңгіме барысында ректор Думан Орынбеков пен проректор Ерасыл Дулатбай шетелде оқып жатқан жастардың бастан кешкен оқиғаларын тыңдап, ұсыныстарына құлақ түрді.    Кампустарды бірге аралап, жатақханаларын көріп, көктемгі Быдгощ көшелерімен серуендеді. Осындай қарапайым да маңызды сәттер көрсеткендей, студенттер Қазақстанның шетелге танылуын  мақтан етеді және университеттің алдағы бастамаларының бір бөлігі болып, алға ұмтылу мақсатын қойған. Бұдан адам мен сенім интернационалдандырудың нақты капиталына айналған  ұрпақты және еларалық байланысты көреміз.

Алда ауқымды жұмыс бар

Ректор Думан Орынбековтің айтуынша, университет жаңа келісімдер пакетін, бірлескен гранттық бастамаларды әзірлеу үстінде және поляк әріптестерін Шәкәрім университетінің форумына қатысуға шақыруда. Қазірдің өзінде білім, инновация және спорт ғылымы салаларындағы жаңа бағыттар талқыланып жатыр.

Сапар қорытындысында ректор Думан Орынбеков WSG университетінің Канцлері Филип Сикора мырзаға, ректоры Марек Хамотқа және бүкіл командасына кәсіби, шынайы серіктестік пен құрмет көрсеткендері үшін алғысын білдірді.

“Біздің ұсыныстарымызды қабыл алып, барлығына егжей-тегжейлі мән бергендеріңізге және қалыптасқан үлгіден тыс,  мағыналы жұмыс істеуге деген ниеттеріңіз үшін ризашылығымды білдіремін. Әсіресе, WSG профессорлық-оқытушылар құрамының біздің университетке деген қызығушылығы және білім беру мен ғылыми шешімдерді бірлесіп әзірлеуге деген ниеттерін жоғары бағалаймыз.”

Алда – бірлескен жаңа модульдер, академиялық тағылымдамалар. Бірақ біздің университет пен WSG арасында бірлесе даму, сенім және білім көпірінің салынғанына деген сенімділік әлдеқайда маңызды.

Shakarim University үшін бұл сапар  академиялық көшбасшылық пен өңірлік дамуды нығайту жолындағы маңызды қадам болды. Польшадағы әріптестерімізге өзгерістерге жол ашатын жаңа мүмкіндіктер үшін және университетімізді халықаралық деңгейде танытуға жағдай жасағаны үшін шын жүректен алғыс айтамыз.